انشر ولك الاجر

الدال علي الخير كفاعله

حبسهم السجن

مش عارف ابدا ازي؟

لكن ناس كتير جدا بتتصل بي عشان يسالوا عن الوالد

تقدر تقول فعلا من كل مكان في الدنيا

اخرهم ناس من قطر بيقولولي

المفروض الحكومة تفرج عن والدك عشان يحسنوا موقفهم

(واضح ان بتوع قطر ميعرفوش يعني اية حكومة مصر(

ولاقي ناس في قناة الاقصى بيطلبوا بالفراج الفوري عن جمال عبد السلام
كل واحد يكلمني يقولي مفتاح الازمة دية هو والدك

انا فاكر الوالد خرج من السجن في6سنة2007

علي طول شهر7كان في مخيم نهر البارد



الحاجة اللي تعبتني جدا ان ام نضال تكلمني تقولي

والله من ساعة لما عرفت خبر اعتقال والدك وانا مش جيلي نوم

ذنوبنا عليكوا زي النار....وصوتها يخلي الواحد يعيط



وتاني حاجة برده تعبتني

لما الوالد بيسألني عن اخبار غزة وشايف في عنيه انه نفسه يكون معاهم
او بينسق عمليات الاغاثة علي المعبر
لكن إن شاء يكون بياخد الثواب زي الصحابة في غزوة تبوك
حبسهم العذر

الساعة12.40الباب بيخبط بشدة تخبيط غير عادي انا حاسس بيه بس مش مستوعب الوالد جيه يصحيني قمت علي طول لاقيت في وشي باب ماسك رشاش وشوية ابواب صغيرة مسكين رشاشات بردة وبعد كدا دخلت غرفة محمد لاقيت ظابط امن الدولة طخين(معرفش ازي دخل شرطة)سلامتك يا دماغي ومعه مخبر اللي جيه المرة اللي فاتت وفي الصاله ظابط تاني وتنين من الابواب العملاقة
فتشول غرفة محمد جامد جدا وسرقوا مكافاة الشغل 10000جنية وخدوا شويه كتب علي مزاجهم من المكتبة وبعد كدا فتشوا في الدواليب
وبعد ذلك فتشوا في غرفتي العظيمة خدوا جداول محاسبة فارغة والغريب اني لقيته محطوط في احراز القضيه مكتوب كدا(عدد واحد جدول محاسبة رمضان فارغ)
وكان تحت السرير خريطة لفلسطين خدوها وحطوها حرز في التحقيق من قلت من زمان سلامتك يا دماغي وخدوا كام شريط وسابوا شريط عبد الحليم فدائي وخدوا الشرائط اللي علي كفهم وتحيا مصر بشرطتها وكان في مقال منشورا في

جريدة الحياة عن دكتور عصام العريان سنة2005فصورته ومن ساعتها حطه علي الباب بتاع امن الدولة اعد يقرأه فقلتله معلش اصلي بحبه جدا قالي عندك حق الراجل محترم جدا؟؟؟؟؟؟؟؟؟؟؟؟؟سلامتك يا دماغي
وبعد كدا دخل غرفة الوالد اعد يفتش فيها ساعة مطلعش الا بحوار مع زوجة خالد مشعل كان علي موقع واجندة التليفونات بتاعت الوالد
قال للوالد جيب مفتاح العربية ومفتاح العيادة
الوالد حاضر بس بعد اذنكوا اغير
ظابط امن الدولة عندي تعليمات اني مسيبكش لوحدك في اي حته
الوالد طيب انا اعمل ايه
ظابط امن الدوله هديك ظهري وغير واول لما تغير قولي
(وحسبنا الله ونعم الوكيل)
نزلوا فتشوا العربية نص ساعه وفتحوا كل حاجة حتي مكان الستبين وتحت الكراسي
بعد كدا علي العيادة فتشوها لمدة ساعة وخدوا شوية كتب الوالد بيحطها عشان المرضي ميزهأوش من الانتظار وقلبوا الادوية علي بعضها و ورق المرضي علي بعض ووووووووووسلامتك يا دماغي
وبعد كدا علي مكان منعرفش فين؟؟؟والساعة2.30في نيابة امن الدولة
حتي 10.30
وسلامتك يا دماغي وحسبنا الله ونعم الوكيل
ده اللي بيحصل مع من اطعم اهل غزة حين تنحي الناس
ده اللي بيحصل مع من تكلم عن اهل غزة حين خرس الناس
ده اللي بيحصل مع من اغاثة الدويقة وارسل قوافل الي مرسي مطروح واعطي مستشفي اسوان التعليمي جهاز السي ارم
ده اللي بيحصل مع اللي يحافظ علي اموال التبرعات ويتقي الله فيها
ده اللي بيحصل مع اللي سافر لبنان اثناء الحرب عشان يوصل مساعدات
اللي في نفس الوقت الامم المتحدة بنفسها كانت خيفه تتدخل

(سلامتك يا دماغي)

نرجوا النشر

صباح التفتيش

الوالد:انتوا نمتوا ولا ايه؟

انا:لا....ومحمد جيه بدري كمان

الوالد:صاحي محمد ولا نام

انا:لا صاحي

الوالد:يعني هنعيش حياة أسريه النهارده

انا:والكنافة اللي ماما عملاها جمده جدا

ده كان الساعة10.30باليل في الشارع امام البيت

بعد كدا في البيت بنتفرج علي اخر حلقة من مسلسل صلاح الدين بتاع جمال سليمان

وماما عماله تقول ياتري الواحد هيعيش يشوف تحرير الاقصي وسخنتنا جدا

والوالد كان بيتفرج وعجبه جدا الموقف بتاع المسيحي اللي بيقارن بين صلاح الدين والحكام اللي هيجوا بعده

وبعد كدا دخلنا ننام الساعة11.10

الساعة12.30

الوالد اصحي يا عمر قمت لقيت بتوع الصاعقه

والمخبرين مبهدلين

ونكمل بعد شويه على بكرة عقبال لما الكمبيوتر يفوق من الغيبوبة

الدكتور جمال الآن في منزله

بعد 115 يوماً من الإعتقال في السجون المصرية تم الأفراج اخيراً عن الدكتور جمال عبدالسلام ... لكم شعرنا بالسعادة ووالدنا يدخل علينا البيت مرة آخرى ... مع أن دخوله كان بعد منتصف الليل ولكن إنتظرنا ذلك الدخول منذ وقت طويل ... يا ربنا لك الحمد كما ينبغي لجلال وجهك ولعظيم سلطانك ... نشكر كل من ساعدنا وخفف عنا ودعا لنا ... لكم أتمني أن تكون هذه هي المرة الأخيرة لإعتقال أبي وإعتقال أي حر في هذا الوطن ولا أري تلك الصورة مرة آخرى ...

وكالة أبشروا لأخبار المعتقلين

عاوز أكشف لأمن الدولة سر قوة الاخوان
وأنا عارف انكوا عرفيه

الحب في الله والإخوة الجامدة اوووووووووي

الفترة اللي فاتت كام أخ كلمني إنهم شافوا رؤية لوالدي ان خرج

أول أخ قالي الدكتور واحشني جدا وكان علي بالي الفترة اللي فاتت

لحد ماشفته في رؤيه ان خرج وجيت اسلم عليه في البيت وكان لابس جلببه بيضاء

وتاني أخ كان في عمرة ورجع اتصل بمحمد وقاله شوفت الدكتور في رؤية انه خرج

وبلغه لما تشوفه اني مش قادر ونفسي اعد معه

تالت أخ ديه في الجون بيشتغل في السعودية عمل عمرة لوالدي وبعد كدا اعد يدعي كتير

وبرده شاف رؤية ان والدي خرج

بس انا استغربت من موضوع عمل العمرة ديه لكن سألت قالولي ان في حاجه اسمها عمرة الأسير

رابع واحد راجل بيصلي الفجر معنا كان دائما هو و والدي بيتمشوا بعد الفجر

ايضا شاف رؤية ان والدي رجع تأني بيصلي معاهم

وقالوه وحشتني

والدي قاله معلش كان بناخد شوية حسنات

والراجل ديه وصفلي والدي بعد ما اطلق اللحية اكنه شافه فعلا

خامس واحد صاحب محل في السيده والمحل بجوار العيادة وبردو شاف

رؤية ان والدي طلع و أول حاجة عملها لما طلع انه راح وسلم عليه

والدي الامس اخد الافراج الثاني من قرار الاعتقال واليوم هيترحل علي امن الدولة ويااااااااااارب يخرج

من المحكوم إلي النطرون

السلام عليكم
سوف أبدأ هذه التدوبنة أبيات شعر ظللت ابحث عنها منذ اعتقال الوالد ألي أن وجدتها في أحدي الأوراق لدي
دع الأيام تفعل ما تشاء
وطب نفسا إذا حكم القضاء
ولا تجزع لحادثة الليالي
فما لحوادث الليل انتهاء
ألطف تعليق سمعته بعد خبر نقل الوالد لسجن النطرون
إيه يا محمد انت يعني فاكرهم هيدوا والدك جائزة الدولة التشجيعية يابني فوق مصر من أيام الفرعنة وهي دولة مابتفهمش مش سجنوا سيدنا يوسف وطردوا سيدنا موسي انت عايزهم يكرموا والدك ولا أي أخ من اللي معاه يا بني أحنا عايشين في مصر و أنشد قائلا عظيمة يااااااااااا مصر يا أرض اللواء وزيرك ده سكر
وطبعا انت عارف ارض اللواء في المهندسين تركب لها من الجيزة ميت عقبة لوا قلت له سلامة دماغك قال ان دماغه نار وولعة قالي مين سي لوا لوا مين يا عم أنا أخوك محمد جمال لموأخذة يا والدي اصل عندي مخبر ساعة يروح و ساعة يجي

نقطة نظام و حبة جد
لما ذهب والدي لسجن المحكوم لم أكن أعلم من الأخوان المعتقلين إلا م/عمر عبدالله والد أخويا أحمد جمال عبد الله

ود/ عمرو حوويشي د/ علاء محرم و الحاج جمال العشري والد أخويا أسامة و لكن بعد الزيارات عرفت ا/ أحمد داله ا/ عكاشة عباد ا/ رضا فهمي د/ محمد عبد العال د/ سالم وممكن لو عايز أقول لك أسماء طلاب معهد شبرا و أسماء 45 أخ اللي كانوا في معتقل المحكوم لكن لما راح والدي سجن النطرون تعرفت علي أخوان الإسكندرية تعرفت علي تلاميذ الحاج عباس السيسي و أبناء الشيخ وجدي غنيم وأخوان د/ إبراهيم الزعفراني و منهم علي سبيل المثال فقط د/ مسعود توكل و ا/ حسام رفعت و ا/ ياسر رشدي ا/ محمد عامر كذلك أخوان المنصورة أخوان بجد و أخوان الشرقية وقتها شعرت بقيمة ورد الرابطة الذي يجمعنا كلنا في المساء شعرت بعناق القلوب رغم عدم سابق معرفة تحرك قلبي عند رؤية هؤلاء الأخوان
بس و للأمانة أسوء حاجة في سجن النطرون أني حرمت من عمي عمر عبدالله و بالتالي من أخويا أحمد عمر عبد الله طبعا ألتقي به في المقر الدائم لنا في الجمعة بس برده في السجن الرؤية ليها طعم ثاني و ربنا يفك أسر والدي وعمي وعمامي كلهم و حسبنا الله ونعم الوكيل .

رســائل
ألي أبي و إخوانه ( واصبروا وصابرو ورابطوا واتقوا الله لعلكم تفلحون) وأكيد بكره أفضل من النهاردة
عندما أري أبناء الإخوان وهم يدافعون عن قضية آبائهم لا أقصد الأبناء من جيلي بل الأبناء من أطفال من أجل الحرية مثلا أنس مالك معاذ شوشة عائشة مالك أحمد ضياء فرحات أقول كيف صور الشيطان لهذا النظام أن اعتقال ألآلاف من الأخوان قد ينهي علي هذة الجماعة كيف؟!
لذلك رسالتي للنظام أجمع كل جنودك و قواتك ولنري لمن الغلبة فنحن لنا ماضيا من 1928 بل ماضي ضارب في عمق التاريخ قبل أكثر من 1400 سنة و لنا الحاضر في آبائنا وشبابنا ولنا المستقبل في الأبناء و الأحفاد و أنت ليس لك ماضي غير ماضي مليء بالفساد والإفساد حاضر مشوه ذليل ومستقبل غير واضح ملئ بالضباب
التدوينة بدأت بحوار إذا لابد من أن تنتهي بحوار بس ده والله بجد و حصل
المكان سجن المحكوم التاريخ 17/5 /2007 تسجيل الأسماء للزيارة
العسكري المسول عن تسجيل الأسماء : اسم المتهم ونوع التهمة
أنا : جمال عبد السلام إخوان
واحدة واقفة عايزة تزور جنائي : هو تبع السنية
أنا في حزم :لأيا حاجة أسمهم إخوان مش سنية
هي : أيوه يعني من بتوع ربنا
أنا ضاحكا : أيوه من بتوع ربنا
هي : ربنا يفك كربهم و سجنهم
أنا : كربهم وكرب كل المساجين
هي غاضبة جدا : لأ جوزي و اللي معاه مذنبين ولاد .... لكن أبوك واللي معاه ناس زى الفل ربنا يشل أيد الظلمة و ينتقم من الظلم أبوك و جابه هنا
و جدت ناس أكثر من اللي كانوا موجودين في المكان تجمعوا علي صياح هذه المراة و قالوا وطبعا قلت معهم أمينمبروك
مبروك للإخوان واحدة مؤيدة للإخوان وتدافع عنهم أعتقد لو أشتغلنا في مرحلة المجتمع 10 سنين لن نصل لمثل هذه الفئةالمهمشة في المجتمع
للنظام الفاشل واحدة من الناس اللي انتوا يتقولوا عنهم معدومي الدخل و تجبوهم في الانتخابات بوجبة و10 جنية صارت بتدعم الاخوان أستعد لمعركة سياسية في البرلمان و قضائية في المحاكم و في الرهان الأكبر الشارع وعامة الشعب
حسبنا الله و نعم الوكيل